तिहार लागेसँगै भक्तपुरमा माटाको पाला बनाउन प्रजापती समुदायलाई भ्याइनभ्याइ छ।
दसैँ सकिएसँगै तिहारको समय आएपछि भक्तपुरका प्रजापती समुदायलाई माटाका पाला तथा भाँडा बनाउन भ्याइनभ्याइ भएको हो।
उनीहरूले यो वर्षको तिहारमा माटाका पाला लगायतका भाँडा मागअनुसार बनाउन नसकेको बताए। अन्य समयमा भन्दा तिहारको समयमा माटोका पालाको माग धेरै हुने गरेको व्यवसायीहरू बताउँछन्।
भक्तपुर नगरपालिका-४ का गणेशकुमार प्रजापती माटोको पाला बनाउनसके बजारमा माग धेरै रहेको बताए। यद्यपि यसको बजार प्लास्टिकका दियोले लिन थालेकोमा उनी असन्तुष्ट देखिन्छन्।
माटो अभावका कारण चाहेजति पाला बनाउन नसकेको प्रजापती बताउँछन्। विगतमा माटो किन्नु नपर्ने भए पनि अहिले भने किन्नुपर्ने अवस्था रहेको उनको गुनासो छ।
माटो किन्नुपर्ने मात्र नभई भाँडाहरू पोल्ने स्थानको अभाव समेत हुन थालेको उनको दु:खेसो छ। यस्तै कारणले गर्दा माटोका भाँडा बनाउने पेसा संकटमा पर्ने पो हो कि भन्ने उनको चिन्ता छ।
भक्तपुरका प्रजापती समुदायले बनाएका माटोको पाला उपत्यका लगायत बाहिर पनि परिचित छन्। मौलिकपनले गर्दा नै उपत्यका बाहिरका सिन्धुपाल्चोक, पोखरा, काभ्रे, धरान लगायत विभिन्न जिल्लाबाट यहाँसम्म पाला किन्न आउने गरेको स्थानीय व्यवसायी बताउँछन्। माटोको पाला लक्ष्मी पूजाको दिन धेरै प्रयोग हुने गर्छ।
Shares
प्रतिक्रिया