प्रहरीले नक्कली नोट छाप्ने प्रिन्टरसहित काठमाडौंबाट दुई जनालाई पक्राउ गरेको छ।
महानगरीय प्रहरी वृत्त कालिमाटीबाट खटिएको प्रहरी टोलीले नक्कली नोटसहित रौतहटका ३५ वर्षीय गनबहादुर लोप्चन र मकवानपुरकी ३९ वर्षीया माया तामाङलाई पक्राउ गरेको हो।
महानगरीय प्रहरी परिसर काठमाडौँका प्रवक्ता, प्रहरी उपरीक्षक रमेशबहादुर बस्नेतका अनुसार नक्कली नोट बोकेका व्यक्ति कलंकीस्थित तरकारी बजारमा तरकारी किन्न आएको मौकामा बुधबार राति पक्राउ गरिएको हो। उनलाई सुराकीको आधारमा पक्राउ गरिएको प्रहरीले जनाएको छ।
पक्राउ परेका व्यक्तिले कीर्तिपुरको एक घरमा प्रिन्टर मेसिनसमेत राखेर नक्कली पैसा छाप्ने गरेको अनुसन्धानमा खुलेको छ। उनीहरूबाट प्रहरीले एक हजार दरको ५१ थान, पाँच सय दरको ५७ थान, १०० दरको दुई थान, प्रिन्टर एक थान, फोटोकपी पेपर, पेपर कटर एक थान, ल्यापटप एक थान, मोबाइल एक थान बरामद गरेको छ।
पक्राउ परेका दुवैसँग आवश्यक अनुसन्धान भइरहेको प्रहरीले जनाएको छ। रासस
प्रतिक्रिया