युनिकोड
सरकारलाई समर्थन गर्ने र मन्त्रिपरिषद्मा सहभागी हुने दलको संख्या टुंगो लगाएर मात्र मन्त्रालय भागबन्डा गरिने भएको छ।
सोमबार मात्र माओवादी केन्द्र, एमाले, रास्वपा र जसपा मिलेर बनेको नयाँ सत्ता गठबन्धनमा कम्तीमा ८ दल सहभागी हुने सम्भावना छ।
त्यसैले सरकारमा सहभागी हुने दल निश्चित भएपछि मात्र मन्त्रालय बाँडफाँट गरिने प्रधानमन्त्रीको सचिवालयका एक अधिकारीले जानकारी दिए।
सत्ता गठबन्धनको बैठक आज दिउँसो ३ बजे बालुवाटारमा बस्दै छ। त्यसअघि प्रधानमन्त्री प्रचण्डले सरकारमा सहभागी हुन विभिन्न दललाई आग्रह गरिरहेका छन्।
‘कुन कुन दल र कति दल सरकारमा सहभागी हुन्छन्, अनि मात्र मन्त्रालय बागबन्डा हुन्छ’, प्रधानमन्त्रीको सचिवालयका एक अधिकारीले मंगलबार बिहान नेपालखबरसँग भने, ‘माधवकुमार नेपालको दल, जनमत पार्टी, नागरिक उन्मुक्ति पार्टी र लोसपा दलसँग एकसरो कुरा भएपछि मात्र भागबन्डाबारे छलफल हुनेछ। अझै तीन/चार दिन लाग्न सक्ने देखिन्छ।’
प्रधानमन्त्री प्रचण्डले सोमबार मात्र नेपाली कांग्रेससँगको गठबन्धन तोड्दै एमाले, रास्वपा र जसपा साथमा लिएर नयाँ गठबन्धन बनाई मन्त्रिपरिषद् पुनर्गठन गरिसकेका छन्। सोमबार एमालेबाट पदम गिरी, माओवादीबाट हितबहादुर तामाङ र रास्वपाबाट डोलप्रसाद अर्यालले मन्त्री पदको शपथ लिएका हुन्। तर उनीहरूका मन्त्रालय तोक्न बाँकी नै छ।
प्रतिक्रिया