प्रहरीले सुरक्षा दिइरहेकै बेला बास्कोटाको घरमा बम विस्फोट

७० करोड कमिसन मागेको विवादित अडियो प्रकरणपछि राजीनामा दिएलगत्तै पूर्वसञ्चारमन्त्री गोकुल बास्कोटालाई सुरक्षा ‘थ्रेट’ बढेको प्रहरीले जनाएको छ।

त्यसयता बास्कोटाका साथै उनको निर्माणाधीन घरमा समेत प्रहरीले २४सै घण्टा सुरक्षा दिइरहेको प्रहरी अधिकारी बताउँछन्।

तर बुधबार बिहानै भक्तपुरको मनहरा फाँटस्थित बास्कोटाको त्यही निर्माणाधीन घरमा बम विस्फोट भएको छ।

अचम्मको कुरा त के भने त्यहाँ प्रहरी तैनाथ रहेकै बेला विस्फोट भएको पाइएको प्रहरी अधिकारी नै बताउँछन्।

भक्तपुरका प्रहरी प्रमुख प्रहरी उपरीक्षक सविन प्रधानले प्रहरी त्यहीं भएका बेला विस्फोट भएको पाइएको बताएका हुन्।

नेपालखबरसँग उनले भने, ‘प्रहरी घरको अगाडिपट्टि थिए, त्यही बेला घरको पछाडिपट्टिको भागमा विस्फोट भएको पाइएको छ। प्रहरी कहाँ चुक्यो भन्ने हामी अनुसन्धान गर्छौं।’

सुक्युरिटी प्रेस खरिदमा कमिसन मागेको अडियो सार्वजनिक भएपछि राजीनामा दिएका बास्कोटामाथि सुरक्षा खतरा हुनसक्ने भन्दै प्रहरीले बन्दै गरेको घरमा समेत सुरक्षा दिइरहेको थियो।

तर सुरक्षाकर्मी डियुटीमै रहेको बेला बम विस्फोट भएको पाइएको छ।

प्रहरी प्रवक्ता शैलेश थापाले भने, ‘उहाँले सुरक्षा नमागे पनि हामीले सुरक्षा व्यवस्था गरेका थियौं, तर त्यसका बावजुद यो घटना भएको छ, हामी छानबिन गर्छौं।’

बास्कोटाले साढे तीनतले घर बनाउँदै थिए। सञ्चारमन्त्री भएपछि प्रधानमन्त्री केपी शर्मा ओलीको घर बालकोटमा बसेका बास्कोटा राजीनामा दिए पनि सरेका छैनन्।