पशुपति क्षेत्रका पसलेलाई ३ दिनभित्र बक्यौता बुझाउन ताकेता, नत्र सम्पत्ति जफत गर्ने चेतावनी

पशुपति विकास कोषले आफ्नो क्षेत्रभित्रका व्यापारीलाई बक्यौता बुझाउन ताकेता गरेको छ।

पसलसँगै पार्किङ व्यवस्थापन गर्दै आएका व्यवसायीलाई कोषले बक्यौता बुझाउन सूचना जारी गरेको हो। ३ दिनभित्र बक्यौता नबुझाए कालोसूचीमा राखेर चल-अचल सम्पत्ति जफत गर्ने चेतावनी कोषले दिएको छ।

भण्डारखाल, अमालकोट कचहरी, लामपोखरी चावहिल, सुमार्गी भवन क्षेत्रका पसल कवलहरूले बक्यौता तिरेका छैनन्। त्यस्तै भण्डारखाल, उमाकुण्ड र वनकालीस्थित बी ११ मा रहेका पार्किङ व्यवस्थापकले सम्झौता अनुसार रकम नतिरेको कोषले जनाएको छ। 

कोषले यसअघि सूचना जारी गरेको थियो। तर अझै पनि केहीले बक्यौता नतिरेपछि ३ दिनभित्र कोषको आय लेखा व्यवस्थापन शाखामा रकम बुझाउन चेतावनीसहित सूचना जारी गरेको हो।