युनिकोड
सिंगापुरका एक पूर्वमन्त्रीलाई न्यायमा बाधा पुर्याएको र गैरकानुनी रूपमा उपहार स्वीकार गरेको कसुरमा बिहीबार १२ महिनाको जेल सजाय सुनाइएको छ।
फर्मुला वनलाई सिंगापुरमा ल्याउन मद्दत गर्ने पूर्वयातायातमन्त्री एस ईश्वरनलाई यस वर्ष ३५ वटा अभियोग लगाइएको थियो। विश्वको सबैभन्दा कम भ्रष्टचार हुने देशमध्येको एक मानिने सिंगापुरमा उक्त कसुर भ्रष्टाचारसँग सम्बन्धित थिए।
ईश्वरनको सजाय अभियोजन पक्षले अनुरोध गरेको ६ देखि ७ महिनाको भन्दा बढी गम्भीर थियो, जुन उच्च अदालतका न्यायाधीश भिन्सेन्ट हुङले सार्वजनिक विश्वासमा मुद्दाको प्रभावलाई ध्यानमा राख्दै ‘स्पष्ट रूपमा अपर्याप्त’ हुने बताएका थिए।
‘सार्वजनिक संस्थाहरूमाथिको विश्वास र भरोसा प्रभावकारी शासनको आधार हो। एउटा सरकारी कर्मचारी निष्ठा र जवाफदेहिताको मापदण्डभन्दा तल झरेको जस्तो देखिने मुद्दामा उक्त सजाय अझै कम हो जस्तो लाग्छ’, हुङले बिहीबार सजाय सुनाउँदै भने।
गत हप्ता ईश्वरनलाई न्यायमा बाधा पुर्याएको र अवैध उपहार स्वीकार गरेको अभियोगमा दोषी ठहर गरिएको थियो। अभियोजनकर्ताहरूले एक अर्बपति घरजग्गा व्यवसायीसँग सम्बन्धित केही सहित केवल पाँचवटा कमजोर आरोप अघि बढाएका थिए।
स्थानीय सञ्चारमाध्यमका अनुसार उनको प्रतिरक्षा टोलीले ईश्वरनलाई अक्टोबर ७ देखि लागू हुनेगरी जेल सजाय सुनाउन माग गरेको छ।
अदालतले ६२ वर्षीय उनलाई त्यस दिन अपराह्न ४ बजे स्टेट्स कोर्टमा आत्मसमर्पण गर्न आदेश दिएको थियो।
तीन लाख अमेरिकी डलरभन्दा बढी मूल्यका उपहार स्वीकार्नेजस्ता आरोप लागेपछि ईश्वरनले जनवरीमा राजीनामा दिएका थिए।
ईश्वरनले सरकारलाई करिब दुई लाख ९५ हजार अमेरिकी डलर नगद, ब्रोम्पटन साइकललगायतका उपहार समेत फिर्ता दिइएको महान्यायाधिवक्ताको कार्यालयले जनाएको छ।
ईश्वरनले सिंगापुरका धनाढ्य होटल व्यवसायी ओङ बेङ सेङको खर्चमा एक बिजनेस क्लासको उडानको अनुसन्धान गर्न सिंगापुरका अधिकारीहरूलाई रोक्ने प्रयाससँग सम्बन्धित मुद्दामा बाधा पुर्याएको कसुर छ।
अन्य चार आरोप होटल प्रोपर्टिज लिमिटेडका प्रबन्ध निर्देशक ओङ र एक निर्माण कम्पनी लुम कोक सेङका शीर्ष निर्देशक ओङबाट ह्विस्की र गल्फ क्लबका बोतलसहित उपहार प्राप्त गरेको सँग सम्बन्धित छन्।
उक्त मुद्दामा कुनै पनि व्यवसायीले सजाय भोगेका छैनन्। रासस/एएफपी
प्रतिक्रिया